Laughter-الضحك Part 1

 كام مره ضحكت من غير سبب

وسمعت الجملة المشهورة والغريبة اللي بتقول

"الضحك من غير سبب قلة أدب"

هل أنت مقتنع بالجملة دي؟..وهل كل ضحك هيستيري في غير مكانه ووضعه الطبيعي يبقي بيدل علي استهزاء الشخص بالحدث اللي حواليه..مش شرط

وده اللي هنكتشفه مع بعض😎

- خلينا نبدأ نعرف يعني ايه الضحك اصلًا، الضحك هو تعبير عن حالة شعورية الإنسان بيمر بيها ومش شرط تكون مقتصرة علي الفرح.  "وده هنعرفه بعد شوية"

تاني حاجه عايزين نعرفها

- بيعمل ايه الضحك ده أو بيفيدنا في ايه؟

ببساطة هو واحد من أفضل أشكال تخفيف الضغط النفسي، وأهم الحاجات اللي بتنمي التواصل البشري ويمكن يبقي في مستوي اللغة اللي احنا بنستخدمها، وبيساعد علي تخفيف الآلم من خلال إفراز هرمون (الاندروفين-Endrophins) 

وبيحسن الذاكره وبيحميها، وشكل من أشكال ممارسة الرياضة "عن طريق انقباض عضلات البطن"..

والحقيقة إن مش هي دي الفوايد بس لكن هنكتفي بدول لأن هو فوايده فوق ما حضرتك ممكن تتخيل..

دلوقتي احنا هنعرف ليه بيحصل الضحك اللإرادي "نوبات الضحك"

 كلنا بييجي علينا وقت بنضحك ونكون مش قادرين نبطل ضحك لدرجة انك تمسك بطنك من الوجع 

علماء النفس أكدوا أن النوع ده من الضحك بيوضح أنماط السلوك وبيكشفها بصورة مباشره جدًا وإن ساعات الإنسان بيبقي عنده القدرة انه يعرف الشخص من ضحكته..

وفي إحدي لقاءات الصحفي "ديڤيد روبسون" مع "صوفي سكوت Sophie Scoot- أستاذة في علم الأعصاب" وهي من أكتر الباحثين في سلوك الضحك

عرضت "سكوت" ڤيديو لراجل ألماني بيعمل تجربه لطيفة مع صحابه وهي انه يرمي نفسه في بحيرة متجمدة ويشوف التلج هيتكسر ولا لا ونط الراجل لكن الحقيقه التلج متكسرش والراجل اتزحلق علي التلج

الغريبة انه بمجرد ما وقع هو قعد يضحك جامد وتلقائيًا صحابه دخلوا في نوبة ضحك شديدة .. ياتري ايه اللي بيفسر الضحك هنا؟

إن تلقائي عقل أصحابه أصدر إشارة عشان يخففوا الألم عن وقعة صاحبهم فإبتدوا يضحكوا هما كمان

شبه الطفل الصغير لو وقع وابتدينا كلنا نضحك ونهيص هو تلقائي هيركز معانا وهينسي انه وقع ومش بعيد يبتسم ويضحك معانا كمان..

فتوصلت "سكوت" إن الغالبية الكبري من الناس مش بيضحكوا لغرض الفكاهه بس بل ده ممكن يكون كنوع من تخفيف الألم بإنك تشارك مع حد الضحك..

وعالم الأعصاب الأمريكي "روبرت بروفين" بذل مجهود في انه يفهم فكرة الضحك ويتعمق فيها

وتوصل إن احنا بنقدر نضحك مع اللي حوالينا أكتر 30 مره من الضحك لوحدنا

واكتشف إن 80٪ من الضحك التلقائي اللي مش محسوب بيكون علي حاجات اصلًا مش بتضحك

زي إنك تكون بتتكلم مع حد لأول مره وتكون حاسس بقلق وتوتر وإحراج وتبتدي تضحك علي أي حاجه بتتقال عشان تقلل من شعورك بعدم الإرتياح

وزي إنك تتعرض ل "صدمة جسدية Physical Shock" فتهرب من الخوف للضحك

وزي الموقف اللي كلنا بنتعرضله ونكون في نص هدومنا إننا نضحك في وسط العزا..وتفسير ده إن عقلك الباطن بيكون مضغوط من الأجواء وبيحاول يهدي بعض الضغوط دي بإنه يخليك تضحك!

 وعشان دي حاجه غير مألوفه بالنسبة للتوقعات المجتمعية فبتظهر للناس بصورة انك وقح ومش محترم أجواء الحزن وبتقلل منها..

نيجي بعد كده لنقطة مهمة وهي عدوي الضحك
 

ودي هنعرفها في part 2
Be Excited😎