-الرجالة مبتعيطش
= ليه يعني؟
- لا هو كده الرجالة مبتعيطش
🙄!!
كتير من الناس مقتنعين إن العياط للراجل مش في محله وإن ده دليل قاطع على ضعفه وعلى كونه لا سمح الله مش راجل!
ولكن العلم والمنطق بيرد على ده وبيزعق بصوت عالي جدًا ويقول "لا" الرجالة ممكن تعيط عاااااادي..مفاجأة مش كده؟
والعلم فسر إن بالرغم من كون الست متوسط دموعها من ٣-٦ مرات في الشهر اللي يكاد يكون ضعف دموع الراجل ده ميمنعش أن الراجل من حقه يعيط
ليه بقى؟ ليه العياط حق مكتسب للجميع؟
أولًا : لإن العياط احيانًا بيكون تنفيس مباشر عن المشاعر السلبية اللي جواك
أحيانًا؟ انتِ قولتي احيانًا؟
ايوه..حصل..عشان مش شرط ابدًا تكون دموعك عاطفية زي انها تحصل بسبب القلق والتوتر والحزن أو انك تكون (طاير من الفرحة)
الدراسات أثبتت ان في انواع تانية من الدموع واللي هي عمومًا بيتقسم ٣ أنواع
١- دموع عاطفية : وده اللي يخص المشاعر وانت تعبان، زعلان، فرحان، مخنوق، متوتر،....الخ
٢- دموع أساسية : دي الدموع اللي لازم عينك تفرزها عشان عينك تكون رطبة
٣- دموع إنعكاسية : دي عينك بتفرزها لما تتعرض لشئ يثير الدموع زي الدخان أو التراب أو إنك تقطع بصل.
احنا بقى ليه بنعيط؟
مفيش دراسة واضحة وثابته للموضوع ده بس أشهر الدراسات قالت إن احنا ممكن نكون بنعيط علشان نخلق جو من "الصعبنيات" وعشان كده دماغك بتقرر إنك هتعيط دلوقتي عشان تحصل على دعم من اللي حواليك.
أو إنك بتعيط علشان تطور لغة التواصل أو بمسمى أخر "التلاعب"، وإن دي شئ فطري ظهر فينا من واحنا اطفال عشان نلفت نظر اللي حوالينا فيبتدي يظهر اهتمام وتعاطف من ناحيتهم فالعلاقة بينا تتطور.
نختم بقى حديثنا عن فوائد الدموع
١- تأثير مهدئ ومسكن الآلام: عن طريق هرمونات بتترفز منها "الإندروفين" اللي بيسكن الآلم وبيحصل نوع من أنواع الراحة الذهنية.
٢- بيساعد على النوم: معروف عن الأطفال إن هما لما يعيطوا يبقوا عايزين نناموا، اللي منعرفهوش بقى إن عياطهم ده بيسهل جدًا عملية النوم وبما إن الدراسات أثبتت إن البالغين ميفرقوش عن الأطفال في عملية البكاء فبالتالي عياطك قبل نومك بيسهله عليك.
٣- تمنع جفاف العين وتحميها من السموم: عينك بتحتاج إنها تعيط وتفرز الدموع لإن ده بيحميها من الجفاف ومن البكتيريا اللي ممكن تتعرضلها.
وعشان كده العياط مش حاجة تقتصر على الجانب الأنثوي لإننا كده هنحرم الجانب الذكوري من فوائد مهمة واحتياجاته من التنفيس عن مشاعره
فالعياط للجميع..والرجالة بتعيط عادي وشكرًا
