Valentine's Day- عيد الحب

اهلًا بكل الناس اللي عارفه معنى الحب ومقدره اهميته في حياة البشر

الحقيقة إن بالرغم من كون اليوم مسماه عيد أو احتفال فكان لازم العلم يتدخل عشان نعرف من أين وكيف الحب اللي احنا بحنتفل بيه🤔

اولًا الحب هو فيضان من المشاعر الايجابية اللي بتطلع عن طريق هرمون الاكسيتوسين مجرد ما تحس انك بتحب حد، والحب شئ لا إرادي في أول العلاقة لكن مع الوقت الجزء الإرادي بيزيد وبتكون فعلًا بتحب اللي قدامك وده قرار منك مش مجرد شعور.. وبالمناسبة الحب اللي اقصده هو اللي بيحسسك بالارتياح ايًا كان الطرف التاني مين هل حد من اهلك، حد من صحابك، المقربين شريك حياتك او ايًا يكن.

عادةً يوم الفلانتين بيبقى وقت مثالي إنك تعبر عن حبك للأشخاص المهمين في حياتك بسبب الضجة اللي عليه مع إنك ممكن تعبر من غير ڤلانتين وإن الحب الحقيقي بنمارسه بإستمرار مش في يوم في السنة.

تعالوا نفتكر أول تجربة حب حقيقي مرينا بيها

أول تجربة لينا كانت عن طريق امهاتنا واحنا أطفال كان حب نقي وسليم من غير متطلبات تعوق تحركاتك وساعتها حسينا بالأمان والراحه من خلال التلامسات اللي كانت بينا وبينها ودي كانت اول مره كلنا حسينا فيها بالحب الحقيقي لما كانت في مشاعر ايجابية في علاقتنا معاها هي اللي كانت بتدينا دافع للبقاء وبتحسسنا بجمال الحياة.

بعد كده ابتدت علاقتنا توسع ونتعامل مع مجتمعات اكتر شوية وابتدينا نلاقي الحب من مصادر مختلفة غرضها الطبيعي هو الشعور بالأمان والاستقرار.

وبالرغم من وجود مشاعر حب كبيرة في العلاقات الإنسانية ساعات بنتوه في علاقات مزيفة تحت مسمى الحب!

والحقيقه ان العلاقات دي ممكن تنتهي بأي شكل من الاشكال أو مش ممكن الحقيقة، هي اجلًا أم عاجلًا هتنتهي.

عالم النفس التطوري ديفيد بوس قال إن "فقدان الحب هو واحد من أسوأ التجارب، التي يمكن للشخص أن يمر بها"

ووضح أنه ممكن الألم النفسي الحقيقي ييجي من خسارة علاقه كانت حاسس فيها بالحب والسعادة أو بالمشاعر الايجابية وفجأة تتحول لبؤس!

الحب في علم النفس ساعات بيقترب من مراحل الجنون وفقدان العقل لإنه بسهوله بيأثر على اضطرابات المزاج وما يصاحبها من أرق وفقدان للشهية والوزن وضياع الحماس للحياة وانك ممكن تعيش تفاصيل جميلة وهي اصلا خيال لا يمت للواقع بصلة وإن من أهم الحاجات اللي بتخلي الحب سلاح ذو حدين إن طاقتك بنسبة كبيرة بتتشحن من الحب اللي في حياتك ممكن يكون سلبي وممكن يكون إيجابي والحب الإيجابي هو من مصادر الغذاء النفسي لانه بيزودك طاقات إيجابية عالية وبيدعم توازنك النفسي.

اعكس بقى كل ده على الحب السلبي عشان المفاجأة هنا ان مش كل العلاقات اللي كنت فيها حاسس بمشاعر ايجابية كانت علاقة حب حقيقية بالعكس دي ممكن تكون طريق للهلاك لانها علاقات مزيفة وكدابة..

مين فينا قبل كده متعرضش لخذلان من صاحب أو اتحط في موقف حسسه انه مش متقدر وان كل الحب والامان اللي حس بيه هو اللي كسره لإنه كان مزيف!

وعشان كده انا جايه اطلب منك النهاردة يوم عيد الحب انك متنخدعش في مشاعر متلغبطة تحت مسمى الحب عشان فقدانه شئ صعب.

انا مش حابه اطول.. بس عايزاك تعرف نقط مهمة من الافضل انها تتحفر في دماغك

 - اعرف ان مش كل من قدملك دعم يبقى ده وراه حب ويبقى ده صاحب عمرك

- قدر كلمة بحبك لما تقولها ولما تسمعها واتأكد انها بتبان في الافعال وهتحسسك فعلا بالامان  

- حب الإمتلاك وفرض الشروط اللي بيحسسك إنك متكتف تحت مسمى الحب ده مش حب صحي.

واخيرًا عبر عن حبك للي حواليك بشكل مستمر ودائم وخُد بالك من الدخول في علاقات مزيفة بتهدر وقت ومجهود تحت مسمى الحب.

HAPPY VALENTINE'S DAY🥰